Դեկտեմբերի 21-ին և 22-ին ԱՐԱՐԱՏ թանգարանում տեղի ունեցավ «Բաց դռների օրեր» միջոցառումը: Հազարավոր այցելուներ հնարավորություն ունեցան կատարել անմոռանալի ճամփորդություն դեպի ԱՐԱՐԱՏ հայկական կոնյակների պատմություն՝ բացահայտելով վարպետության և փառքի ժառանգությունը՝ ԱՐԱՐԱՏ-ի առաջին նմուշներից մինչև նոր եզրեր:

Այս տարի նախաձեռնությունը նվիրված էր Արարատ լեռը բարձրանալու 190-ամյակին: Այդ կապակցությամբ ԱՐԱՐԱՏ թանգարանը և Pan Photo-ն ներկայացրեցին Արարատ լեռան բացառիկ ֆոտոշարք, որն իրականացվել է Կարապետ Սահակյանի 2019 թվականի սեպտեմբեր – հոկտեմբեր ամիսներին կատարած յուրատեսակ ուխտագնացության ժամանակ: Ֆոտոշարքը ներկայացնում է բիբլական լեռան զանազան և ոչ այդքան հայտնի եզրերը՝ խառնարանից մինչև սարից բացվող մայրամուտի տեսարան, լեռնալանջից մինչև գագաթ: Ֆոտոշարքի տպագրությունն իրականացվել է կտավների վրա՝ դրանով իսկ ընդգծելով պատկերների գեղարվեստական բնույթը և կարծես հուշելով, որ Արարատը յուրաքանչյուրիս մտապատկերի և հույզերի արտացոլումն է:

Միջթանգարանային համագործակցության շրջանակներում ԱՐԱՐԱՏ թանգարանն այցելուներին տրամադրեց նաև Խաչատուր Աբովյանի տուն-թանգարանի տոմսեր՝ առաջարկելով նորովի բացահայտել մեծն գրողին, ով 190 տարի առաջ առաջին անգամ բարձրացավ Արարատ լեռան գագաթը: