Հոկտեմբերի 18-ին Մեսրոպ Մաշտոցի անվան Մատենադարանում կայացավ «Ժամանակին ընդառաջ. Վերականգնումը Հայաստանում» խորագրով ցուցադրությունը, որին աջակցել է ARARAT կոնյակը: Ցուցահանդեսը ներկայացնում է Հայաստանի վերականգնողական արվեստանոցներում մասնագետների կողմից իրականացված տարիների աշխատանքները:

Ցուցադրությանն աջակցել և պահոցներից վերականգնված նյութեր են տրամադրել մի շարք պատմամշակութային հաստատություններ, որոնց շարքում են Հայաստանի պատմության թանգարանը, Հայաստանի ազգային պատկերասրահը, Հայաստանի ազգային արխիվը, Մայր Աթոռ Սուրբ Էջմիածնի թանգարանները, Էրեբունի պատմահնագիտական արգելոց-թանգարանը, Պատմամշակութային ժառանգության գիտահետազոտական կենտրոնը, Պատմամշակութային արգելոց-թանգարանների և պատմական միջավայրի պահպանության ծառայությունը։

Ցուցահանդեսը հատկանշական է, քանի որ ներկայացված է շուրջ 5000 տարվա մշակութային կտրվածք, ինչպես նաև ևս մեկ անգամ ոգեկոչում է ժառանգության պահպանման և պատմական ինքնության ձևավորման գաղափարները։

«Ռեստավրացիան արհեստի, արվեստի և գիտության միացություն է, որը շատ քիչ մարդիկ կարող են անել։ Այս առումով նրանց աշխատանքն արժանի է գնահատականի»,- ասաց Մատենադարանի տնօրեն Վահան Տեր-Ղևոնդյանը։

Միջոցառման ավարտին այցելուները ջերմ քննարկումներ ձևավորեցին մեկ գավաթ ARARAT կոնյակի շուրջ՝ միմյանց հետ կիսվելով ցուցադրությունից ստացած տպավորություններով։