Հուլիսի 9-ին ARARAT թանգարանը հյուրընկալեց ճապոնական կինոմշակույթի հայտնի գործիչ, ռեժիսոր, դերասան, սցենարիստ, նկարիչ  Տակեշի Կիտանոյին։

Այցելության ընթացքում Տակեշի Կիտանոյին ներկայացվեց լեգենդար հայկական կոնյակի պատմությունը, նրա ստեղծման գաղտնիքները և կոնյակագործ վարպետների ստեղծագործական որոնումները։

Կինոգործիչը նաև այցելեց ARARAT թանգարանի գանձարան, որտեղ պահվում է հայկական կոնյակագործության տարեգիրը ներկայացնող ARARAT կոնյակի բացառիկ նմուշներ։

“Առաջին անգամ կոնյակ խմելիս տեսա, որ շշին պատկերված է Արարատը ու հասկացա, որ դա այն լեռն է, որտեղ իջել է Նոյը: Քանի որ հայկական կոնյակը Ճապոնիայում  մեծ տարածում չունի, ինձ թվում էր, որ գործարանն էլ է փոքր լինելու:  Բայց այցելելով հասկացա, որ  մեծ ու տպավորիչ գործարան եւ  պատմություն ունեք”, - լրագրողների հետ զրույցում նշեց Կիտանոն:

Կիտանոյի ավանդը կինոյի մշակույթում ահռելի է։ Նա նկարահանվել է ավելի քան 50 ֆիլմում, հեղինակել մի քանի վեպ, որոնք վերածվել են սցենարների, թողարկել բանաստեղծություններ և կինոքննադատություններ և արժանացել բազմաթիվ մրցանակների՝ Վենետիկի և Կաննի կինոփառատոններում։

Տակեշի Կիտանոն «Ոսկե ծիրան» միջազգային կինոփառատոնի պատվավոր հյուրն է, ում փառատոնի բացման արարողության ժամանակ շնորհվեց «Փարաջանովյան թալեր» պատվավոր մրցանակը կինոյում ունեցած անգնահատելի ավանդի համար։