Հայաստանում դեռևս 1887 թվականին հիմնադրված կոնյակի արտադրությունն այս տարի նշում է իր 135-ամյակը։ ARARAT-ն իր հոբելյանական տարին բացում  է ARARAT Ժառանգության նշանավորման երեկոյով։

Երեկոյի բացառիկությունն ամբողջացնում է անցկացման վայրը՝ Կարեն Դեմիրճյանի անվան մարզահամերգային համալիրի «Հայաստան» սրահը, որը հանդիսանում է հայկական նրբաճաշակ ճարտարապետության և հյուրընկալության խորհրդանշական վայրերից մեկը։

«Անցյալի, ներկայի ու ապագայի սահմաններից դուրս, բայց և պատմություն կերտող ժամանակի տիրույթում»․ միջոցառման հեղինակների ստեղծագործական միտքը հանգավորվեց տարածքի ճարտարապետական և դիզայներական լուծումներով, որոնք գեղարվեստորեն ներկայացրեցին լեգենդար ժառանգությամբ ապրանքանիշի անցյալը, ներկան և ապագայի տեսլականը:

Հանդիսանալով պատմական այս կամ այն դարաշրջանի նորարար՝ ARARAT-ի նորամուծությունները ժամանակի ընթացքում մշտապես վերածվել են ավանդույթների՝ վարպետության, նվիրվածության և անմնացորդ սիրո:

Միջոցառման հեղինակների մտահղացմամբ՝ դասականի և ավանգարդի միահյուսման գաղափարը փոխաբերականորեն արտացոլված է շրջանաձև ARARAT բարի մեջ, որտեղ միջոցառման հյուրերին հնարավորություն է ընձեռվել համտեսելու ինչպես լեգենդար կոնյակի դասական տարբերակները, այնպես էլ կոկտեյլներ պատրաստված թե´ ARARAT կոնյակով, թե´ բրենդի նորարարություններով՝ ARARAT Apricot-ի և ARARAT Coffee-ի հիմքով:

ARARAT-ի ավելի քան դարավոր ժառանգությունը ներկայացվել է հատուկ Art-տաղավարում, որտեղ կարելի է տեսնել լեգենդար ապրանքանիշի էվոլյուցիան։ Թանգարանային ճշգրտությամբ ցուցադրվել են  թե´ օրիգինալ վինտաժային պիտակները, թե´ 1902 թվականին ստեղծված առաջին հայկական տեսակավոր կոնյակի՝ «Ընտիր»-ի վերաթողարկված կոլեկցիոն տարբերակը։

Վարպետության եզրերն ու կատարելության հավերժական որոնման ներդաշնակությունն ամբողջացրել են ARARAT-ը պատկերող հատուկ ինստալյացիաները, որտեղ հյուրերից յուրաքանչյուրը կարող էր տեսնել նոր կուպաժներ ստեղծելու արվեստը:

«135-ը մեզ համար լոկ գեղեցիկ թիվ չէ, այլ պատմության մի հանգրվան, որտեղ կարող ենք գտնել վերաիմաստավորման նոր եզրեր։

ARARAT-ի տարեգրության մեջ տեղ են գտել բազմաթիվ հետաքրքիր դրվագներ, որոնք հյուսվել են յուրաքանչյուրիս պատմություններով։ Մեզանից յուրաքանչյուրի հաջողությունների, հաղթանակների, նոր ծանոթությունների և կյանքի այլ երջանիկ պահերի վայելքը լրացրել է դասական կոնյակի մի գավաթը։ Եվ հենց այս մարդկային պատմություններն են դարձնում  ARARAT-ի ժառանգությունը իրապես լեգենդար։ 

Չէ՞ որ ժամանակն առանց հուզական երանգների կորցնում է իր ողջ հմայքը։ Ուստի մեզ համար կարևոր էր հոբելյանական տարվա բացումը նշել ARARAT-ի ընկերների շրջանում, կիսվել ջերմությամբ՝ միասին գրելով ARARAT-ի պատմության նոր էջերը»,- մեկնաբանել է Երևանի կոնյակի գործարանի գործադիր տնօրեն Սերգեյ Խաչատրյանը։

Մասնագետների կողմից մշակված հատուկ ձայնային ձևավորումը ապահովել էր երեկոյի վառ տրամադրությունը՝ ներառելով տարբեր ժամանակաշրջանները խորհրդանշող երաժշտական ստեղծագործություններ։